Çay qırağının əcəb seyrəngahı var, AFFA-nın köməyi hayıf ki, yoxdur
Stadionun ərazisində inşa edilmiş və əsas komandanın ixtiyarına verilən yeni akademiya binasının açılışına dəvət aldığım Tovuzda məlum oldu ki, "Turan Tovuz" rəhbərliyi şəhər ərazisində daha bir təlim-məşq bazasının tikintisini planlaşdırır.
Şəhər mərkəzindən 2-3 km aralıda - elə Abulbəylidə yerləşən əsas stadion və bazanın yaxınlığında - "çay qırağı" deyilən meşəlikdəki sahə təxminən iki hektar ərazidən ibarətdir.
Tovuz klubunun inkişafı üçün mühüm işlər görən İdarə heyətinin sədri Ehtiram Quliyev AFFA rəhbərliyini təbiət qoynundakı xudmani ərazi ilə əyani tanış etdi, planı barədə məlumat verdi və mədəni-səliqəli formada dəstək istədi. Sadəcə, dəstək, maddi yardım yox.
Bunadək əsas stadionun süni ot örtüyünün dəyişdirilməsinə maliyyə sarıdan kömək məqsədilə AFFA-ya etdiyi müraciətləri cavabsız qalmış iş adamı yeni təlim-məşq bazasında iki süni, bir təbii ot örtüklü meydançanın salınmasını nəzərdə tutduqlarını dedi, ayaqüstü federasiyanın yeni baş katibi Cahangir Fərəcullayevlə bir xeyli müzakirə apardı.
Abulbəylidəki yeni bazanın ərazisi həqiqətən əla seçilib. Tam çayın qırağıdır, havası mükəmməldir.
Molla Pənah Vaqifin gözəl misralarına istinadən dəyişikliklə ifadə etsək;
Çay qırağının əcəb seyrəngahı var,
AFFA-nın köməyi hayıf ki, yoxdur.
İstər özündən əvvəlki rəhbərlərin "Turan Tovuz" üçün gördüyü işləri hər zaman sevgi və sayğı ilə yada salması, istərsə də idman mətbuatının varlığının futbolun inkişafına sanballı töhfələr verməsini ön plana çəkməsi baxımından əksər federasiya-klub rəhbərlərinə nümunə olan "Huner Group"un sahibi onu da diqqətə çatdırdı ki, Tovuz şəhər stadionunun ot örtüyünün dəyişdirilməsi işlərinə yayda başlayacaqlar.
Əlbəttə ki, AFFA-dan kömək-maddi dəstək almadan. Hərçənd Ehtiram bəy daha əvvəlki müraciətlərində dəfələrlə deyib ki, süni ot örtüyünü təbiiyə çevirmək üçün kifayət qədər maliyyə vəsaiti lazımdır.
Lakin qeyd etdiyim kimi, AFFA-dan səs çıxmayınca, Quliyev əlini daşına altına tək qoymaq məcburiyyətini seçib.
Tovuzu, futbolu sevdiyi, Azərbaycan futboluna töhfə vermək istədiyi üçün.
Ölkədə futbolu inkişaf etdirmək öhdəliyi olan cavabdeh qurum - AFFA isə hələlik 4-5 milyon dollara əcnəbilərə yazdırdığı inkişaf strategiyasını oxumaqla, bənzətmə aparsaq, seyrəngaha tamaşa etməklə məşğuldur...
Elvin ƏHƏD
