"Turan Tovuz" BƏYANAT yaydı: "Əsassız xəbərlər yayılmaqdadır"
"Turan Tovuz" son günlər mətbuatda barələrində yazılan xəbərlər haqda bəyanat paylaşıb.
"Mediasport" xəbər verir ki, qərb təmsilçisi baş məşqçi Kurban Berdıyevin komandadan ayrılmasının yalan olduğunu iddia edib.
Bəyanatı olduğu kimi təqdim edirik:
"Son günlər klubumuz haqda həqiqətə uyğun olmayan, əsassız xəbərlər yayılmaqdadır.
Mövsümün başa çatmasına baxmayaraq, baş məşqçimiz Kurban Berdıyev ölkəmizi tərk etməyib və növbəti mövsümün hazırlıq planlarını həyata keçirmək və daha güclü heyət formalaşdırmaq üçün mütəmadi olaraq klub rəhbərliyi ilə fikir mübadiləsi aparır.
Qeyd etmək istəyirik ki, baş məşqçimizlə müqaviləmiz davam edir və klub rəhbərliyi daha iddialı komanda formalaşdırmaq üçün Kurban Berdıyevə tam dəstəyini nümayiş etdirir.
Azarkeşlərimizi və futbol ictimaiyyətini dəqiqləşdirilməmiş, klubun imicinə zərər vuran, əsassız və yalan xəbərlərə etibar etməməyə çağırırıq.
Bildirmək istəyirik ki, təlim-məşq toplanışı, transfer siyasəti, infrastruktur və digər layihələrlə bağlı bütün məlumatlar rəsmi olaraq klubumuz tərəfindən ictimaiyyətə açıqlanacaq".
