Emin Mahmudov: "Biz bunu azarkeşlərimizə borcluyuq"
"Mediasport" "Neftçi"nin futbolçusu Emin Mahmudovun müsahibəsini təqdim edir.
O, Azərbaycan Kubokunun "Sabah"la ilk yarımfinal matçından sonra jurnalistlərin suallarını cavablandırıb.
Oyun haqda nə deyə bilərsən?
- Oyun istədiyimiz kimi getmədi. “Sabah” əks-hücumlarda bizi yaxşı tutdu. Amma qarşıda hələ cavab oyunu var. Sona qədər mübarizə apararaq, geri dönüş edəcəyik.
Evdəki məğlubiyyətdən sonra dönüş etmək nə dərəcədə real olacaq?
- Asan olmayacaq. Oxşar matçlarımız olub. Bir neçə il əvvəl səfərdə Kipr təmsilçisi “Aris”ə 0:2 hesabı ilə uduzduqdan sonra öz meydanımızda 3:0 hesabı ilə qalib gələrək geri dönüş etmişdik. Hər şey mümkündür. Biz bunu azarkeşlərimizə borcluyuq.
Oyununuzda nə çatışmır?
- Hər şey istədiyimiz kimi alınmır. Biz tez-tez topu itiririk. Oyunumuz yaxşı getmədi. İşlərin pis getdiyini başa düşürük, amma dəyişmək lazımdır.
Cavab görüşünə qədər şəxsi forman tam hazır olacaq?
- Zədədən sonra cəmi bir dəfə tam məşq etmişdim. Ona görə də “Sabah”a qarşı oyun çətin oldu. Ümid edirəm ki, növbəti oyuna tam hazır olacağam.
Finala çıxacağınıza inanırsınız?
- Əlbəttə. Böyük hesabla uduzmamışıq ki, ümidimizi itirək. Vəziyyətin gedişatını dəyişməyə çalışacağıq.
Oyundan sonra “Sabah”ın baş məşqçisi Vasili Berezutski “Neftçi”yə və hakimlərə qarşı oynadıqlarını bildirib.
- Nə dediyini bilmirəm. Hakimlər bizə kömək etmədilər.
Bassala Sambunun yoxluğu təsir etdi?
- Bəli, o, komandaya tez adaptasiya olub yaxşı oynamağa başlamışdı. Onun varlığı vacib idi. Amma onsuz da biz daha irəli getməyə çalışacağıq, başqa hücumçularımız var.
