Fernandu Santuşun qeyri-ciddiliyi - BEKARÇILIQ fonunda "ağ-yalan"
"Milli komandanın toplanışları zamanı futbolçuların fiziki durumu, məşqə və ya oyuna hazır olub-olmamaları ilə bağlı hər gün tibbi heyətdən tibbi arayış alıram. Belarus yığması ilə matç üçün tibbi rəydə hazır olmadığı göstərilən yeganə oyunçu Şahrudin Məhəmmədəliyev olub. Qapıçımızla aramızda söhbət olub, bundan sonra o, toplanışdan azad edilib və yerinə Əlirza Müştabazadə dəvət olunub. Ümumiyyətlə, məşqçi karyeram ərzində heç vaxt "oynamağa hazır deyil" diaqnozu qoyulan futbolçunu oynatmamışam. Rza Cəfərovun sağlamlıq durumu qaydasında olduğu üçün meydana o çıxıb və çox yaxşı çıxış edib".
Bu, Azərbaycanın A milli komandasının baş məşqçisi Fernandu Santuşun bəyanatfason açıqlamasıdır. Durduq yerdə həşir salıblar. Nədən hürkdükləri anlaşılmır.
Ümumiyyətlə, nə bəyatanbazlıqdır e, işiniz-gücünüz qurtarıb? Çox bekarsız?
Belə çıxır ki, indi hansı saytda xəbər dərc edilsə, mövqe bildirəcəksiniz? Ya hansı mütəxəssis ünvanınıza söz atsa, cavab verəcəksiz?
Yəni həqiqətən işin ciddiliyini başa düşmürsüz siz?
Kişilər, işlə məşğul olun, işlə. 4-5 milyona yazdırdığınız "İnkişaf Strategiya"sının adı var, özü yox - bundan danışın.
Kölgəsindən qorxan adamlar kimi, düşmüsüz əl-ayağa. Bu qədər qeyri-ciddi olmayın. Gülünc obyektinə çevrilirsiz axı. Yaxud siz Allah, bu, nə açıqlamadı belə?
"Azərbaycan millisində olduğum müddətdə Elvin Cəfərquliyev və Şahrudin Məhəmmədəliyevin bir daha milliyə çağırılmayacaqlarını nə vaxtsa rəsmi və ya şifahi olaraq deməmişəm. Bu barədə yayılan məlumat da həqiqəti əks etdirmir və tamamilə yalandır. Əksinə, adlarını sadaladığım futbolçular bilirlər ki, çağırışlar zamanı həmişə onlara arxalanıram. Elvin haqqında yalnız Haiti ilə oyundan sonra mətbuat konfransı zamanı jurnalistin “Futbolçunu cəzalandıracaqsınızmı”, - sualını cavablandırarkən danışmışam. Cavabım isə belə olub: “Səhv etmək insana məxsusdur və buna görə oyunçunu cəzalandırmamalıyıq. Mən həmişə onlara güvənmişəm və sağlam olduqları müddətdə bunu etməyə davam edəcəyəm".
Bərbad vəziyyətdə olan ölkə futboluna cavabdeh qurum, A milli komandanın baş məşqçisi olan o boyda Avropa çempionu, yəni, həqiqətən bu qədər bekardı ki, bir saytda yazılan xəbərə və ya hansısa mütəxəssisin adi açıqlamasına bu boyda reaksiya verir? Belə bir şey yoxdusa, niyə əl-ayağa düşmüsüz ki?
Ya da nəsə var ki, federasiya səviyyəsində qabaqdangəlmişlik edirsiz. Nə o, nə də budusa, işinizlə məşğul olun da, niyə hoqqa verirsiz ki?..
Yoxsa mən də iddia edirəm ki, Rza Cəfərova Belarusla oyuna çıxmaq üçün 8 iynə vurulub. Buyurun, isbat edin ki, belə deyil.
AYXAN
