"Qarşımızda son vəzifə - Rumıniya çempionatının finalı qalıb" - Azərbaycan yığmasının üzvü
"Çox şadam ki, Rumıniya Kubokunu qazandıq. İndi qarşımızda son və ən çətin vəzifə - Rumıniya çempionatının finalı qalıb".
"Mediasport" xəbər verir ki, bunu Rumıniyanın “Alba” klubunda çıxış edən Azərbaycan millisinin voleybolçusu Yelizaveta Ruban deyib.
Rumıniya Kubokunun son qalibi federasiyanın mətbuat xidmətinə açıqlama verib.
Avropa Voleybol Konfederasiyasının (CEV) Kubokunda ikinci yeri tutan hücumçu nəticələrdən danışıb:
“Ölkə kubokunun finalında rəqibimiz ötənilki çempion idi və oyun çox maraqlı keçdi. Bilirdik ki, rəqib güclüdür və asan olmayacaq. Ona görə də ciddi hazırlaşdıq və qalib gəldik.
Bu görüşdən sonra istirahətə vaxt yox idi, çünki iki gündən sonra bizi CEV Kubokunun finalı gözləyirdi. İtaliyada baş tutan ilk oyunda uduzsaq da, evdəki cavab matçına ciddi hazırlaşırdıq. Hər şey ən yüksək səviyyədə təşkil olunmuşdu, ab-hava inanılmaz idi. Finalda uduzmağımıza baxmayaraq, nəticədən razıyıq, turniri ikinci kimi başa vurduq. Qarşımızda son və ən çətin vəzifə - Rumıniya çempionatının finalı qalıb. Əlbəttə, yorğunluq var. Lakin çalışacağıq ki, çempionluğu qazanaq və mövsümü daha çox qələbə ilə başa vuraq”.
