Daha 5 güləşçimiz bu gün tatami üzərinə çıxır - Dünya çempionatı
Slovakiyanın Bratislava şəhərində güləş üzrə U-20 dünya çempionatı davam edir.
"Mediasport" xəbər verir ki, üçüncü yarış günündə Azərbaycanın 5 təmsilçisi mübarizəyə aparacaq.
Qadınlardan Esra Məmmədli (53 kq) təsnifat mərhələsində qazaxıstanlı Dinara Daulkızı, Zəhra Kərimzadə (72 kq) 1/4 finalda türkiyəli İlayda Cinlə üz-üzə gələcək.
Yunan-Roma güləşində Elmin Əliyev (82 kq) təsnifat mərhələsində gürcüstanlı Luka Pipia ilə qarşılaşacaq.
Ayxan Cavadov (60 kq) mübarizəyə 1/8 finalda Maqomed Varayev (Fransa) - Manuel Emilio Saldate (ABŞ) cütünün güclüsü ilə duellə başlayacaq.
Emin Cavadlı (55 kq) isə bürünc medal uğrunda görüşdə Jiale Li (Çin) – Hiro Sakamoto (Yaponiya) duelinin qalibinə rəqib olacaq.
Qeyd edək ki, komandamızın heyətində hələlik yunan-Roma güləşçilərindən Cavidan Nehmətov (77 kq) gümüş, Tural Əhmədov (63 kq) bürünc medal qazanıb.
Mundial avqustun 23-də yekunlaşacaq.
