Bu gün "El Klasiko" var: Əzəli və əbədi rəqabətin 262-ci seriyası
Bu gün futbol dünyasının əsas diqqəti İspaniyanın paytaxtı Madriddə olacaq.
Möhtəşəm "Santyaqo Bernabeu" stadionunda cari mövsümün ilk, ümumilikdə tarixin 262-ci "El Klasiko"su baş tutacaq.
Dünya nəhəngləri - "Real" və "Barselona" arasında əzəli və əbədi rəqabətin əsası 1902-ci il mayın 13-də qoyulub.
Bütün turnirlər daxil, bunadək keçirilmiş 261 duelin 105-də qələbə qazanan tərəf "kral klubu" olub.
Katalonların aktivində 104 qalibiyyət varsa, tərəflər 52 dəfə "sülh" bağlayıblar.
"El Klasiko" tarixində ən böyükhesablı qələbəni madridlilər əldə ediblər - "Real" 1943-cü il iyunun 19-da İspaniya Kuboku çərçivəsində reallaşmış matçda rəqibini 11:1 hesabı ilə məğlub edib.
La Liqanın 10-cu turuna təsadüf edəcək bugünkü görüş Bakı vaxtilə saat 19:15-də start götürəcək və "İdman Azərbaycan" kanalı vasitəsilə canlı yayımlanacaq.
Xatırladaq ki, komandalar Primeranın turnir cədvəlində hazırda 1-2-ci yerləri bölüşürlər. Kataloniyalıları 2 xal qabaqlayan "blankos" 24 xalla liderdir.
Ayxan
