"Üç il əvvəl bu kluba böyük ümidlər və hədəflərlə gəlmişdim" - Sekidika
"Üç il əvvəl bu kluba böyük ümidlər və hədəflərlə gəlmişdim. Bu gün isə minnətdarlıq dolu bir ürək və əbədi olaraq mənimlə qalacaq xatirələrlə ayrılıram".
"Mediasport" xəbər verir ki, bunu "Sabah"dan ayrılan Cessi Sekidika sosial şəbəkə hesabında etdiyi paylaşımda yazıb.
Nigeriyalı vinger Azərbaycan çempionunun heyətində qazandığı uğurlardan söz açıb:
"Birlikdə inanılmaz anlar yaşadıq, çətinliklərin öhdəsindən gəldik və bu klubun tarixinin bir hissəsi olacaq nailiyyətləri qeyd etdik.
Üç kubok qazandığım üçün çox qürur duyuram, amma ən əsası, yol boyu bizimlə olan insanları və münasibətləri qiymətləndirəcəyəm".
Sekidika "Sabah"ın azarkeşlərinə minnətdarlıq edib:
"Komanda yoldaşlarıma, məşqçilərimə, işçi heyətinə, rəhbərliyə və bu səyahəti xüsusi etmək üçün pərdəarxası əməyi keçən hər kəsə təşəkkür edirəm.
İlk gündən sevgi və dəstəyə görə azarkeşlərə minnətdaram. Bu klubun tarixinin bir hissəsi olduğum üçün qürur duyuram və karyeramın bu dönəminin mənə verdiyi hər şeyə görə minnətdaram.
Kluba davamlı uğurlar və gələcək üçün ən yaxşısını arzulayıram. Hər şey üçün təşəkkür edirəm".
Cessi "Sabah"ın heyətində bir dəfə Azərbaycan çempionu, iki dəfə isə ölkə kubokunun qalibi olub.
O, Masazır təmsilçisinin forması ilə 107 oyun keçirib, 21 qol və 18 məhsuldar ötürmə ilə fərqlənib.
View this post on Instagram
