Maqsud Adıgözəlovla sabahı olmayan Azərbaycan futbolu
"Sabah" Azərbaycan Premyer Liqasında ardıcıl 6 oyundur qələbə üzünə həsrət qalıb.
Masazırı təmsil edən "bayquşlar" 5 dəfə heç-heçə ediblər, yalnız 1 görüşdə 3 xala seviniblər.
Maqsud Adıgözəlovun timsalında rəhbərlik daha təcrübəli xorvatiyalı Krunoslav Renduliçi istefaya göndərib klubu ondan məşqçilik səviyyəsi baxımından qat-qat geri qalan Vasili Berezutskiyə həvalə etməklə, əslində, nə qədər qeyri-peşəkar olduğunu göstərmişdi.
Fakt budur ki, dəlləkliyi "Sabah"ın başında öyrənən rusiyalı hər cür imkan və şərait içində üzsə də, komanda sanki süni nəfəslə yaşayır.
Bunca sponsoru, dəstəyi, dayağı, hərtərəfli şəraiti olan "Sabah" büdcəsini 5-6 dəfə qabaqladığı "Şamaxı"dan, "Kəpəz"dən fərqlənmir.
Bir Ayxan Abbasovun gördüyü işlərə baxırsan, bir Azər Bağırovun, bir də Vasili Berezutskinin...
Bu gün Azərbaycan futbolunun da başında oturan Maqsud Adıgözəlov gör nə qədər bərbad idarəçidir ki, inanılmaz imkanlara malik komandası saman çöpündən yapışıb 1 xala dua edir.
Adıgözəlovun uğurla rəhbərlik edə bilmədiyi və birbaşa çempionluğa oynamağa borclu olan klub bu gün 4-cü pillədə qərarlaşmış "Turan Tovuz"dan 7, lider "Qarabağ"dan 31 xal (!) geri qalır.
Sabaha zərrə ümid verməyən komandası illərdir eyni aqibəti yaşayır. Maliyyə dayaqları getdikcə möhkəmlənir, məşqçiləri əlcək kimi dəyişir, dünyanın dörd bir tərəfindən legionerləri topa ilə transfer edir, oyun və nəticə isə bərbad!
Azərbaycan futbolunda ədalətsizlik pik nötqəyə çatıb: Bu cür uğursuz adam indi Azərbaycan futbolunu idarə edənlərin önündə gəlir.
Nonsens!
Ayxan
