"Ölkəmizdə nə qədər futbol bilicisi, ağzıgöyçəklər varmış" - DEPUTAT
Sovet hökuməti vaxtı bütün sahələr üzrə, xüsusilə də pambıq yığımında bir Sosialist öhdəliyi vardı, təkcə futboldan başqa. Yəni neftçilər öhdəlik götürürdü, amma "Neftçi" komandası yox.
Pambıq yığımında da ən böyük öhdəlik Bərdə rayonunda idi. Plan 100 min ton, sosialist öhdəliyi 120 min ton.
Rüstəm Səfərəliyev Bərdənin katibi olarkən bu öhdəliyi yerinə yetirmişdi, dövlətə 120 min ton pambıq vermişdi. İclasda Rüstəm dayıya söz atmışdılar ki, «pripiska» eləmisən. O da hirslənib demişdi:
- Yaxşı, deyək ki, bunun iyirmi min tonunu pripiska eləmişəm, yüz min ton ki vermişəm.
İndi "Qarabağ"dan elə danışırlar ki, elə bil Sosialist öhdəliyi götürüb ki, Avropa çempionu olacaq! "Qarabağ" belə bir öhdəlik götürməyib. Əsas öhdəliyi yerinə yetirib – Çempionlar liqasına düşüb və Avropanın iki məşhur klubunu da məğlub edib. Amma biz buna sevinmirik, bunu görmürük.
Klub son oyunda "Atletik Bilbao"ya uduzdu. Dostlar, "Atletik Bilbao"yla oynayırdı ey, "Səbail" komandasıyla yox.
Bu futboldu, udmaq da var, uduzmaq da. "Qarabağ" da nəinki gücü çatan qədər, gücündən də artıq oynadı. Belə demək mümkünsə, başından hündürə hoppandı.
Hələ qarşıda beş oyun var. İnşallah, "Qarabağ" "Qarabağ" olduğunu sübut edəcək. Uzun illərdi həm Avropada, həm də dünyada "Qarabağ"ı tanıdan Qurban Qurbanov hələ son sözünü deməyib.
Komanda uduzanda yanında olmaq lazımdı ey, udanda nənəm də komandanın yanında olur.
Başını dik tut, Xocam! Başını dik tut "Qarabağ"! Biz səninləyik! Qələbən də bizimdir, məğlubiyyətin də. Sosial şəbəkələrdə yazılanlara da fikir verməyin.
Amma, maşallah, ölkəmizdə nə qədər futbol bilicisi, ağzıgöyçəklər varmış.
Aqil Abbas (Millət vəkili, yazıçı)
