Azərbaycan klubu legionerini aldadıb 2 aylıq maaşını vermədi
“İlk dövrənin bitməsinə 3 tur qalmış Bakıdan ayrılmaq məcburiyyətində qaldım. Çünki mənimlə düzgün davranmadılar, 2 aylıq maaşımı ödəmədilər. Mən də miqrasiya xidməti ilə problem yaşamaq istəmirdim".
"Mediasport" xəbər verir ki, bu sözləri Belarus mətbuatına açıqlamasında 1-ci Liqa klubu "Baku Sporting"dən ayrılan müdafiəçi Nikita Tarbyakov deyib.
25 yaşlı futbolçu Bakı təmsilçisinin ona qarşı hörmətsizlik etdiyini bildirib:
"Miqrasiya ilə ciddi problemlər yaşamamaq üçün risk etmədim. Amma hava limanında yeni bir problem yaşadım. Klub mənim müvəqqəti qeydiyyatımı vaxtında etmədiyi üçün 600 Belarus rublundan çox məbləğdə (təqribən 310 manat) cərimə ödədim. Klub rəhbərliyi daim vədlər verirdi, kartıma heç bir ödəniş köçürülmədi. Buna görə komandadan ayrılmaq məcburiyyətində qaldım”.
Qeyd edək ki, Tarbyakov hazırda ölkəsinin 1-ci Liqa təmsilçisi "Lida"da forma geyinir.
