Dünya çempionatının pley-off mərhələlərinin püşkü atıldı
Gələn yay ABŞ, Kanada və Meksikanın birgə ev sahibliyi ilə keçiriləcək futbol üzrə dünya çempionatının pley-off mərhələsinin püşkü atılıb.
"Mediasport" xəbər verir ki, tədbir FİFA-nın İsveçrənin Sürix şəhərində yerləşən mənzil-qərargahında keçirilib.
Birinci səbətdə yer alan Türkiyə milli komandası yarımfinalda Rumıniya ilə qarşılaşacaq. "Ay-ulduzlular" bu səddi keçsələr, finalda Slovakiya - Kosovo cütün güclüsü ilə üz-üzə gələcəklər.
Avropa zonası üzrə 4 lisenziya uğrunda 16 yığma arasında gərgin mübarizələr reallaşacaq.
Pley-off yarımfinal və finaldan ibarət olacaq. Hər qrupun qalibi DÇ-2026-da iştirak imkanı əldə edəcək.
Bir matçdan ibarət olacaq yarımfinal oyunları 2026-cı il martın 26-da, final görüşləri isə martın 31-də oynanılacaq.
Qitələrarası pley-off görüşləri isə 2026-cı ilin martında yalnız Meksikanın Qvadalaxara və Monterrey şəhərlərində keçiriləcək.
Xatırladaq ki, tarixdə ilk dəfə mundial 48 milli komandanın iştirakı ilə təşkil olunacaq.
Hələlik ev sahibləri - ABŞ, Meksika, Kanada ilə yanaşı, Kurasao, Panama, Haiti, Yaponiya, Yeni Zelandiya, İran, Argentina, Özbəkistan, Cənubi Koreya, İordaniya, Avstraliya, Braziliya, Ekvador, Uruqvay, Kolumbiya, Paraqvay, Mərakeş, Tunis, Misir, Əlcəzair, Qana, Kabo Verde, Cənubi Afrika, Seneqal, Fil Dişi Sahili, Qətər, Səudiyyə Ərəbistanı, İngiltərə, Fransa, Xorvatiya, Norveç, Portuqaliya, Niderland, Almaniya, İsveçrə, Şotlandiya, İspaniya, Avstriya və Belçika DÇ-2026-nın final mərhələsinə yüksəliblər.
Mundial 11 iyun - 19 iyul tarixlərində baş tutacaq.
DÇ-2026. Avropa zonası. Pley-off mərhələsi
A yolu
İtaliya - Şimali İrlandiya
Uels - Bosniya və Herseqovina
B yolu
Ukrayna - İsveç
Polşa - Albaniya
C yolu
Türkiyə - Rumıniya
Slovakiya - Kosovo
D yolu
Danimarka - Şimali Makedoniya
Çexiya - İrlandiya
DÇ-2026. Qitələrarası zona. Pley-off mərhələsi
Yarımfinal
Yeni Kaledoniya – Yamayka
Boliviya - Surinam
Final
Konqo Demokratik Respublikası - Yeni Kaledoniya / Yamayka cütünün qalibi
İraq - Boliviya / Surinam cütünün qalibi
