"Bu il bizim hədəfimiz Premyer Liqada qalmaqdır" - Tsxadadze
"Mövsümün başlaması münasibətilə hər kəsi təbrik edirəm. Ümid edirəm ki, maraqlı mövsüm olacaq".
"Mediasport" xəbər verir ki, bu sözləri "Qəbələ"nin baş məşqçisi Kaxaber Tsxadadze Azərbaycan Premyer Liqasının 1-ci turunun "Karvan-Yevlax"la matçından sonra (1:1) keçirilən mətbuat konfransında deyib.
Gürcüstanlı çalışdırıcı öncə oyunla bağlı fikirlərini bölüşüb:
"Xeyli sayda qol imkanlarımız oldu. Futbolçularım yaxşı oynadı. Hər birindən razıyam. Biz fürstələri dəyərləndirə bilmədik. Əvəzində rəqib qol vurdu. Futbolda belə hallar olur".
Təcrübəli mütəxəssis daha sonra jurnalistlərin suallarını cavablandırıb:
Sizə elə gəlmir ki, oyunun qırılma nöqtəsi etdiyiniz əvəzetmələr oldu? Meydana daxil olanlar sanki oyuna güc qata bilmədi...
- Sizinlə razıyam. Onlar hamısı bizim komandanın üzvləridir. Yorğun olduğu üçün bəzi futbolçuları əvəzlədim. Düz qeyd edirsiz, meydana buraxdığımız oyunçulardan gözlədiyimiz nəticəni ala bilmədik. Komanda 11 oyunçudan ibarət deyil. Hamıya şans verməliyik. Sanqare bir həftədir bizə qoşulub. Uyğunlaşmaq üçün ona vaxt lazımdır.
Start heyətində 1-ci Liqadakı komandadan 6 futbolçu var idi. Bunun hansı mənfi və ya müsbət cəhətləri var?
- Hamısından razıyam. Komandada gənclərlə yanaşı, təcrübəli oyunçular da var. Doni Massumo Azərbaycana gələnə kimi peşəkar səviyyədə oynamırdı. Amma bu gün onun oyununu görürsüz.
"Qəbələ"nin bu mövsüm hədəfi nə olacaq?
- Bu il bizim hədəfimiz mümkün qədər yuxarı yerlərdə qərarlaşmaq və Premyer Liqada möhkəmlənməkdir. Aşağı liqadan gələn komanda üçün yüksək yerlər uğrunda oynamaq çətindir. Addım-addım gedirik. Heç bir komandadan çəkinməyəcəyik, "avtobus" qurmayacağıq.
Qol fürsətlərinin dəyərləndirilməməsini rəqib qapıçının ustalığına bağlayırsız, yoxsa sizin oyunçular zərbələri istənilən kimi vura bilmədi?
- Rəqibin qapıçısı çox yaxşı idi. Bizim oyunçularda da soyuqqanlılıq çatmırdı. Əsas odur ki, qol imkanları yarada bilirik. Buna ancaq sevinirəm.
