Məgər Haiti millisini, Belarus yığmasını məğlub etməli idik?
Yadımda "Planet Parni iz Baku" KVN teatrının səhnələrindən birində işlənən ifadə qalıb, təxminən belə idi: "Olar ki, hisslərimi söyüşlə ifadə edim?"...
Artıq bu həddi çoxdan keçmişik. Tam hüququm var. Amma yox, kimisə təhqir etməyəcəm.
Hərçənd olmayan futbolumuzun "yeddibaşlı əjdahafason" idarəçilərinin formalaşdırdığı AZƏRBAYCAN YIĞMASI illərdi dünyanın dörd bir tərəfindəki komandalara uduzmaqla bizi söyməkdən, təhqirdən, tapdalanmaqdan betər edib.
Onlarda qanacaq, qabiliyyət, millət, vətən, bayraq sevgisi, utanmaq hissi yoxdu, bizə nə gəlib ki?..
Həm Belarus yığmasına uduzmaq faciə deyil.
Bu ölkənin təmsilçilərindən təkcə BATE Avropanın bir nömrəli klub yarışı Çempionlar Liqasının qruplarında "meydan sulayanda" Azərbaycan təmsilçilərini avrokubokların 3-4-cü mərhələlərinə yaxın buraxmırdılar. Eləcə 1, uzağı 2, ən yaxşı halda 3-cü raundda ağzımızın üstündən necə vurub geri qaytarırdılarsa, növbəti mövsümün sonunadək özümüzə gələ bilmirdik.
Ona görə hətta bu gün "ölü" vəziyyətdə olsa belə, Belarus millisinə məğlubiyyət dünyanın sonu deyil. Üstəlik, futboldur, bu gün hər şey mümkündür.
Faciə bilirsiz, nədi? Bu gün 90 faiz üzdə olan, perspektivli sayılan gənclərdən formalaşdırılmış yığmanın oynadığı biabırçı futbol.
Faciə bilirsiz, nədi? Bu heyət üzvlərinin - olanımızın küçədə, məhəllədə top-top oynayan uşaqlardan fərqlənməyərək ardıcıl iki, maksimum üç dəqiq ötürmə verə bilməməsi.
Faciə bilirsiz, nədi? Ölkənin A milli komandası adlandırılan yığmanın əsas hücumçularının Nəriman Axundzadə, Musa Qurbanlı, dayaq müdafiəçisinin ayağı ayağına dolaşan Bəhlul Mustafazadə olması.
Faciə bilirsiz, nədi? Yoldan ötən hər rəqibə uduzandan sonra həyasızcasına sifət edərək quru üzrü istəməmək, istəyə bilməmək.
Onlarla belə faciəvi misallar çəkmək olar, kişi. Bu komandanın, bu futbolçuların qüruru, cəsarəti, əzmi, iradəsi, döyüşkənliyi, perspektivi yoxdu. Allah haqqı yoxdu!
Yoxsa kimsə Haiti yığmasının bizdən zəif olduğunu, yaxud Belarus millisini məğlub etməli olduğumuzu düşünürsə, iddia edirsə, vallah, futboldan danışmasın.
Sənin ölkənin əsas komandasında ardıcıl pas verə biləcək 3 futbolçu yoxdu. 3 pası ardıcıl verəcək bir futbolçun yoxdu. Bu, nə pafosfason hoqqabazlıq, yerə-göyəsığmazlıqdı belə?
Rövşən Nəcəfdən beşi, Sərxan Hacıyevdən dördü, AFFA-ya sırf şəkil çəkdirmək üçün "yuxarı"lardan rəhbər göndərilən Cahangir Fərəcullayev müəllimdən ikisi, Fernandu Santuşdan da onikisi olsa, yenə heç nə dəyişməyəcək.
Bu AFFA rəhbərliyi Azərbaycanın, Azərbaycan xalqının, milli azarkeşinin düşməni deyilsə, mütləq və mütləq şəkildə portuqaliyalı ilə müqaviləyə az miqdarda kompensasiya ilə son verməli, dərhal A millinin bütün yüksək, lüzumsuz xərclərini minimuma endirməli və yola yerli mütəxəssislərdən biri ilə davam etməlidir. Birmənalı şəkildə!
İkinci bir yol varsa, mən futboldan heç nə qanmıram.
AYXAN
