Rüsvayçı məğlubiyyətin şərhi: "Komandam deyiləni edə bilmədi"
"Rəqibimiz güclü komanda idi. Həm də kifayət qədər təcrübəlidirlər. Kobud səhvlər etdik, rəqib də bundan maksimum faydalandı".
"Mediasport" xəbər verir ki, bu sözləri 19 yaşadək futzalçılardan ibarət Azərbaycan millisinin baş məşqçisi İlqar Aslanov deyib.
Mütəxəssis Xorvatiyada start götürən Avropa çempionatının əsas mərhələsində Bosniya və Herseqovina yığmasına biabırçı məğlubiyyət haqda danışıb.
O, 2:10 hesablı qarşılaşmanı belə şərh edib:
“Rəqib taktiki, texniki və fiziki baxımdan hazırlıqlı idi. Qrupumuzda birinci yer uğrunda mübarizə aparacaq əsas komandalardandır. Oyunumuz da alınmadı, uşaqlar sanki start həyəcanını boğa bilmədilər. Nəticədə hesab erkən açıldı".
İ.Aslanov futzalçıların tapşırıqları yerinə yetirə bilmədiklərini vurğulayıb:
"Onların ilk saniyədən pressinq edəcəklərini demişdik. Ümumiyyətlə, necə oynayacaqlarını başa salmışdıq. Hətta oyunlarını da izləmişdik. Amma komandam deyiləni edə bilmədi. Bir tərəfdən qınamıram, çünki bu səviyyəli oyunlarda iştirak etməyiblər. Bugünkü oyun futzalçılarımız üçün əyani təcrübə olacaq. Dediklərimizi bu gün meydanda gördülər. Yəqin kii, bundan nəticə çıxaracaqlar”.
Qeyd edək ki, komandamız sabah Xorvatiya millisi ilə qarşılaşacaq və qrupda ilk yeri tutacaq kollektiv qitə birinciliyinin final mərhələsinə vəsiqə qazanacaq.
