Azərbaycan çempionu olmuş klub mövsümün sonunda dağılacaq
Azərbaycanda daha bir peşəkar futbol klubu fəaliyyətini dayandıracaq.
"Mediasport"a verilən məlumata görə, 2-ci Liqaya düşməyin astanasında olan 1-ci Liqa təmsilçisi "Cəbrayıl" yayda fəaliyyətinə son verərək həvəskar statusa keçəcək.
Tanınmış futbol adamı, hazırda "Qəbələ"də çalışan Səbuhi Səfiyarlının 2023-cü ildə əsasını qoyduğu Qarabağ klubu bu yaxınlarda baş məşqçi postuna sabiq milli üzvü Təmkin Xəlilzadəni gətirsə də, uğursuzluq zolağından çıxa bilmir.
Sponsor və İcra hakimiyyətinin də əlini çəkdiyi kollektiv maliyyə çətinliyi üzündən son dönəmlərini yaşayır.
Yarandığı ildə Azərbaycan yığması və "Qəbələ"nin futbolçusu, əslən cəbrayıllı Cavid Hüseynovun rəhbərliyi altında iddialı çıxış edən komanda hazırda 19 turdan sonra 16 xalla 10 komandalı liqada 9-cudur.
"Cəbrayıl" ilk ilində iştirak etdiyi AFFA Region Liqasında məhz Cavid Hüseynov-Elhad Nəziri duetinin rəhbərliyində çempion adını qazanmışdı.
Ardınca çıxış etdiyi 2-ci Liqada 2-ci yeri tutaraq 1-ci Liqada 10-cu olmuş "Araz Saatlı"ya pley-off görüşlərində qalib gələrək Birinci Liqaya vəsiqə əldə etmişdi.
