Ayxan Abbasov: "Çoxdandır ki, bu xalı, qələbəni haqq edirdik"
"Komandamı və azarkeşlərimizi təbrik edirəm. Səfərdə bizi tək qoymadılar, yaxşı dəstək oldular. Çoxdandır ki, bu xalı, qələbəni haqq edirdik".
"Mediasport" xəbər verir ki, bu sözləri "Şamaxı"nın baş məşqçisi Ayxan Abbasov deyib.
Mütəxəssis Azərbaycan Premyer Liqasının 25-ci turunun "Səbail"lə səfər görüşü haqqında fikirlərini bölüşüb.
2:0 hesablı vacib qələnəi şərh edən məşqçi daha sonra jurnalistlərin suallarını cavablandırıb.
- Önəmli oyun idi. Qışdan sonra "Səbail" bircə "Qarabağ"a uduzmuşdu. Mövsümün ikinci yarısına çox yaxşı başlamışdılar. İlk dəqiqələrdə oyunumuz istədiyimiz kimi alınmadı. Ondan sonra futbolçularım toparlandı, tapşırıqları yerinə yetirməyə çalışdılar. İkinci hissə tam üstünlüyümüz şəraitində keçdi. Böyükhesablı qələbə ola bilərdi. Premyer Liqada qalmaq üçün sona qədər biz də mübarizə aparacağıq.
Bu qələbə gələcək oyunlara komandanı kökləməyə nə dərəcədə təsir edəcək?
- Rəqibimizdən 6 xal irəlidəyik. Qışdan sonra pis oyunumuz olmamışdı.Təəssüf ki, uduzurduq. Sadə səhvlər edirdik. Futbolçularda konsentrasiya yaxşı idi. Müdafiədə yaxşı oynadıq. Qələbə gələcək üçün motivasiyadır.
İki fərqli hissə izlədik. Niyə ilk hissədə oyununuz alınmadı?
- "Səbail" matça yaxşı başlamışdı. Onlar evdə çox yaxşı oynayırlar. Cavid Hüseynov gələndən komanda fərqlənir. Amma qapımız qarşısında təhlükə yox idi.
Sonuncu səfər qələbənizi sentyabr ayında qazanmışdınız. 8 oyun idi ki, səfərdə qalib gəlmirdiniz. Bu gün uduzsaydınız, sonuncu pilləyə yuvarlana bilərdiniz. Bu qədər yükün altından necə çıxdınız?
- Bunların hamısını hər gün fikirləşirik. Məşqçilik stressli işdir. Bunu fikirləşsək də, komandaya büruzə verməməliyik. Sonuncu pilləyə düşə bilərdik. Bu gün sonuncu yerdəki komanda da dəyişə bilər. Fərq 4-6 xaldır. Bunu fikirləşib tam da özümüzü stressə salmırıq. Amma onu da düşünürük ki, hər an sonuncu pilləyə düşə bilərik. Bu qələbə bizi daha da irəli apardı.
Kapitan sarğısı tez-tez dəyişir. Onu nəyə əsasən dəyişirsiniz?
- Yeni kapitan lazım idi meydançada. Səbayıl Bağırov, Arsen Ağcabəyova güvənmişik. Onlar olmayanda, kapitanlığı Leroy Mikelsə vermişdik. O da olmayanda sarğını Rafael Məhərrəmliyə veririk.
Leroy Mikels "Sabah"a qarşı oynayacaq?
- Çətin. Ağır zədədir. "Sabah"la yoldaşlıq görüşündə ilk dəfə zədələnmişdi. "Zirə" və "Neftçi" ilə görüşlərdə ayağında sümük zədəsi yarandı. Müalicə olunur.
