Milli komandamızın bombardiri: "Təcrübəsizlik sözünü dedi"
“Çalışdıq oyunlara tam motivasiya, məsuliyyətlə çıxaq. Ancaq təcrübəsizlik sözünü dedi. Bizim üçün maraqlı turnir oldu. Rəqiblərimiz də Avropada seçilən komandalar idi”.
"Mediasport" xəbər verir ki, bu sözləri 19 yaşadək futzalçılardan ibarət Azərbaycan millisinin üzvü Ədalət Ələkbərov deyib.
Avropa çempionatının əsas seçmə mərhələsində yığmamızın 5 qolundan 3-nün müəllifi olan hücumçu yarışla bağlı fikirlərini bölüşüb.
Gənc futzalçı Bosniya və Herseqovinaya böyük hesabla (2:10) uduzmağa layiq olmadıqlarını bildirib:
"İlk oyuna çox uğursuz start verdik. Halbuki belə hesabla məğlub olmalı deyildik. Sonra toparlandıq, ertəsi gün qrupun əsas favoriti hesab edilən Xorvatiyaya qarşı daha yaxşı oynadıq. Görüş heç-heçə başa çatsa da, qələbə qazana bilərdik.
Bəlkə də Bosniya və Herseqovinaya qarşı da belə mübarizə aparsaydıq, meydanı xalla tərk edə bilərdik. Görünür, turnirin həyəcanı, erkən qol buraxmağımız fərqin böyüməsinə səbəb oldu. Son görüşümüz qardaş Türkiyə yığmasına qarşı oldu. Bu matç da kifayət qədər gərgin keçdi. Uduzsaq da, rəqib 3 xalı çətinliklə qazandı. Qrupun sürpriz komandası idi. Türkiyə ilə oyunda qaçırdığım epizodları düzgün dəyərləndirə bilsəydim, qələbə qazanardıq”.
Ədalət Ələkbərov turnirin yığma komanda üçün faydalı olduğunu vurğulayıb:
“Bu turnir bizə böyük təcrübə qazandırdı. Oyunlar göstərdi ki, istənilən rəqiblə oynamaq və yaxşı nəticə qazanmaq mümkündür. U-19-un ümumi çıxışı barədə danışsaq, ilkin mərhələdən başladıq. San Marinoda təşkil olunan qrup oyunlarında Kosovo favorit göstərilirdi. Ancaq biz onlara qalib gəlməklə əsas mərhələyə doğrü iri addım atmış olduq.
Təəssüf ki, bu görüşdəki nəticə San Marino önünə bir qədər arxayın çıxmağımıza səbəb oldu. Hər şeyə rəğmən, ilk dəfə mərhələ adladıq, əsas mərhələdə isə ilk xalımızı qazandıq. Yaxşı tərəfdən də seçilə bilərdik, sadəcə ilk matçdakı həyəcan, oyuna tam köklənə bilməməyimiz mane oldu. Təbii ki, bunlar bizə yaxşı mənada dərs oldu.
İndi çalışmalıyıq ki, özümüzü inkişaf etdirək, gələcəkdə əsas millinin heyətinə cəlb olunaq”.
Qeyd edək ki, millimiz 3 oyunda 1 xal toplayaraq 4 komandalı qrupda sonuncu yeri tutub.
