"Bosniya və Herseqovinaya məğlubiyyət uşaqları ayıltmışdı"
“Xorvatiya millisi Avropanın güclü komandalarından biridir. Çətin görüş olacağını bilirdik".
"Mediasport" xəbər verir ki, bu sözləri 19 yaşadək futzalçılardan ibarət Azərbaycan milli komandasının baş məşqçisi İlqar Aslanov deyib.
Mütəxəssis Avropa çempionatının əsas mərhələsinin Xorvatiya yığması ilə oyunu haqda fikirlərini bölüşüb.
3:3 hesablı bərabərliyi şərh edən məşqçi bildirib ki, futzalçılar ilk matçda Bosniya və Herseqovinaya 2:10 hesablı məğlubiyyətdən dərs çıxarıblar:
"Bosniya və Herseqovinaya məğlubiyyət də sanki uşaqları ayıltmışdı. Çünki dünənki görüşdən fərqli olaraq bu dəfə rəqibdən çəkinmədilər. Hətta hesabı onlar açsa da, ardıcıl qollar vurmağımız uşaqları daha da həvəsləndirdi, özünəinamı artırdı. Bu gün əzmkarlıq göstərdik.
Rəqibi də yaxşı öyrənmişdik. Bilirdik ki, ilk saniyələrdən pressinq edəcəklər. Bu təzyiqə hazır idik və bizim də öz cavablarımız oldu. Qazanılan xala görə komandamı təbrik edirəm. Bu, U-19-un tarixində əsas mərhələdə qazanılan ilk xaldır. Oyunlar çox keçirdikcə uşaqlarda inam artacaq, təcrübə də qazanacağıq, nəticələrimiz də yaxşı olacaq”.
Qeyd edək ki, VII qrupda yer alan millimiz növbəti görüşünü bu gün Türkiyə yığmasına qarşı keçirəcək.
Qrup oyunlarını birinci sırada başa vuracaq milli qitə çempionatının final mərhələsinə vəsiqə qazanacaq.
