Rövşən Nəcəfin ili çıxdı, amma...
SOCAR rəhbəri Rövşən Nəcəfin AFFA-nın prezidenti təyin edilməsindən 1 il ötür.
2024-cü il aprelin 2-də Rövnəq Abdullayevi əvəzləyən qurum rəhbəri elə ilk gün verdiyi açıqlamalarla diqqəti çəkmişdi.
Xüsusilə AFFA prezidenti seçilən gün keçirdiyi mətbuat konfransında jurnalistlərin suallarına ayrı-ayrılıqda ciddi yanaşması, tədbirli və hazırlıqlı cavablar verməsi, daha sonra KİV nümayənədlərini SOCAR-ın ofisinə dəvət edərək səmimi söhbətlər aparması ilk baxışdan Rövşən Nəcəfin məhv olmuş Azərbaycan futbolunun dirçəlməsi naminə əl-qolunu çirmələyəcəyi, gecəsini gündüzünə qatacağı təəssüratı yaratsa da, zaman bütün daşları yerinə oturtmağa başladı. Və aydın oldu ki, o da pafos imiş...
Yeni rəhbərliyin geridə qalan 365 günlük fəaliyyətinə nəzər salsaq, fəallıq detalları çox olsa da, faydalı iş əmsalı yoxdur. Sanki hər şey gözdən pərdə asmaq üçündür.
Hər şey var, heç nə yox.
Ələyi ələnmiş qocaman, Azərbaycan futboluna, futbol mentaliletinə tamamən yad Fernandu Santuşun təyinatı ilə AFFA-ya rəhbərliyinin uğurlu olmayacağının siqnallarını verən Rövşən Nəcəfin əksər sözləri kimi, veteranlarla bağlı verdiyi vədlərə də əməl etmədiyi göz qarşısındadır.
AFFA-ya prezident seçildiyi gün veteran futbolçularla bağlı suala cavabında bildirmişdi ki, onlara dair xüsusi proqramları olacaq, veteranlardan maksimum faydalanacaqlar. "Acaq-əcək" gələcək zaman şəkilçiləridir, zaman gəldi, gedir, amma vədə əməl edən tapılmır.
Katalizator rolunu oynayan mətbuata ikili yanaşmanın əsasını qoymuş sabiq baş katib Elxan Məmmədovun yolunu "inamla davam etdirən" Rövşən Nəcəf-Sərxan Hacıyev duetinin milli komandaların timsalında qısa zaman kəsiyində fiaskoya uğraması bir daha əyani şəkildə göstərdi ki, seçdikləri strategiya yanlışdır. Neçə milyona yazılır-yazılsın.
Milli komandaların il ərzindəki nəticələri bir yana, təkcə AFFA İcraiyyə Komitəsində yer alanların ad-soyadlarına baxmaq kifayətdir ki, SOCAR rəhbərinin 365 günlük fəaliyyətinin sıfırın altında olması anlaşılsın.
Biz o strategiyanı illərdir pulsuz veririk. Oynaya bilməyənlər üçün yer həmişə dar olur. Özü yıxılan ağlamaz.
İliniz mübarək, Rövşən Nəcəf!
Mediasport.com.az
