"Turan Tovuz"dan evdə yeni rekord və antirekord təkrarlandı
Azərbaycan Premyer Liqasının 28-ci turunun “Turan Tovuz” – “Qarabağ” oyununda rekord qeydə alınıb.
"Mediasport" xəbər verir ki, qarşılaşmanı arenadan 6500 tamaşaçı izləyib.
Bu, Qərb təmsilçisi üçün çempionatdakı yeni rekorddur.
2022/23 mövsümündən Premyer Liqada çıxış edən Tovuz klubunun ev matçlarında bundan çox izləyici olmayıb. Əvvəlki qarşılaşmalarda rekord 6000-ə bərabər idi.
Bu göstəriciyə 3 dəfə təsadüf olunub. 2023-cü il oktyabrın 20-də (2:2), 2024-cü il martın 17-də (1:3) və noyabrın 1-də (0:0) “Qarabağ”a qarşı keçirilən görüşləri 6000 seyrçi izləyib.
Tovuzlular, həmçinin antirekordunu təkrarlayıblar.
Kurban Berdıyevin baş məşqçisi olduğu komanda 1:4 hesabı ilə uduzmaqla Premyer Liqadakı ən ağır ev məğlubiyyətini təkrarlayıb.
Bunadək yalnız bir komanda səfərdə qərblilərə böyük hesabla qalib gəlmişdi. 2024-cü il aprelin 19-da “Sumqayıt” 4:1 hesablı qələbəyə sevinib.
“Turan Tovuz” həm də ev görüşündə buraxılan qol sayında antirekordunu təkrarlayıb. “Sumqayıt”dan sonra “Qarabağ” da Qərb səfərində 4 top vurub.
