Slot: "Azərbaycan çempionuna qarşı oynamaq çox xoş olacaq"
"Əvvəlcə onu deməliyəm ki, ötən mövsüm olduğu kimi, bu dəfə də çox çətin bir püşk oldu. Bunu gözləyirdik, çünki Çempionlar Liqasında, xüsusilə də yeni formatda asan rəqib olmur. Amma aydın olan odur ki, bu püşk həm də çox həyəcanlıdır".
"Mediasport" xəbər verir ki, bu sözləri "Liverpul"un baş məşqçisi Arne Slot deyib.
Çempionlar Liqasındakı təmsilçimiz "Qarabağ"ın rəqiblərindən olan Mersisayd təmsilçisinin niderlandlı çalışdırıcısı püşkatma mərasimi haqqında fikirlərini bölüşüb və "köhlən atlar" haqqında da danışıb:
"Real"ı yenidən "Enfild Roud"da qarşılamaq xüsusi hadisədir. Ötən mövsümün oyunu unudulmaz idi, bu dəfə də elə olacağını gözləyirəm. Bütün dünyanın izləyəcəyi görüş olacaq. Şəxsi olaraq isə, PSV ilə oynamaq xoşdur. Onlar ardıcıl iki dəfə çempion olublar. Eyni şey Türkiyədə üç mövsüm ardıcıl çempion olan "Qalatasaray"a və Azərbaycan çempionu "Qarabağ"a aiddir.
Həmçinin, "İnter", "Atletiko", "Ayntraxt" və "Marsel" kimi komandalarla qarşılaşmaq bu turnirin gücünü göstərir.
Heç bir oyun asan olmayacaq. Bu, aydındır. Amma əminəm ki, azarkeşlərimiz "Enfild Roud"da keçiriləcək görüşləri və böyük arenalarda, fanatik azarkeşlər qarşısında keçiriləcək səfər oyunlarını səbirsizliklə gözləyirlər".
Xatırladaq ki, "köhlən atlar" qitənin nüfuzlu klub turnirinin liqa mərhələsində "Çelsi", "Ayaks", "Kopenhagen" və "Ayntraxt"la Bakıda, "Liverpul", "Benfika", "Napoli" və "Atletik"lə İspaniyada üz-üzə gələcək.
