"Rəqib meydanda azlıqda qaldıqdan sonra biz hesabı qorumaq istəyirdik"
"Ağır qələbəyə görə çox sevinirəm. "Neftçi" bu mövsüm daha yaxşı komanda kimi formalaşıb, həm də heyətini gücləndirib".
"Mediasport" xəbər verir ki, bu sözləri "Turan Tovuz"un baş məşqçisi Kurban Berdıyev deyib.
Mütəxəssis Azərbaycan Premyer Liqasının 3-cü turunun "Neftçi" ilə matçından (1:0) sonra jurnalistlərin suallarını cavablandırıb:
Göstərdiyiniz oyundan nə dərəcədə razı qaldınız?
- Meydanda oyunçuların sayı eyni olanda yelləncək xarakteri daşıyır. Məqamlar olurdu ki, biz, bəzən də onlar yaxşı oynayırdı. Rəqib meydanda azlıqda qaldıqdan sonra hesabı qorumaq istəyirdik. Bu da səhvlərə gətirib çıxardı.
İbrahima Vadjinin performansından razı qaldınız?
- Bəzi epizodlarda. Yavaş-yavaş, getdikcə artırır. Toplanışda iştirak etməmişdi. Oyuna pis qoşulmadı. Bəzi məqamlarda daha yaxşı ola bilərdi.
Komandanın hədəfi çempionluqdur, legioner limiti də ləğv edilib. Çempionluğa oynamaqdan ötrü daha neçə futbolçuya ehtiyac var?
- Mövsüm hələ yeni başlayıb. Elə komanda yoxdur ki, istədiyi kimi oynasın. Hər komanda üçün mövsümün əvvəlində çətin olur. Bir neçə transfer planı var. Amma mövqelər barədə danışmayacam.
Komandanın "vuran ayaq" problemi var. Sanki elə görüntü var ki, Olabe olmasa, komanda qol vurmayacaq...
- Yerində iraddır. İstənilən halda bunun üzərində iş gedir.
