Azərbaycan güləşçiləri AÇ-lərdə indiyədək 71 qızıl medal qazanıb
Azərbaycan güləşçilərinin müstəqillik dövründə böyüklər arasında Avropa çempionatlarında qazandığı qızıl medalların sayı 71-ə çatıb.
"Mediasport" xəbər verir ki, pəhləvanlarımız son olaraq ötən ay Slovakiyada keçirilən qitə birinciliklərində 4 qızıl mükafata yiyələnib.
Ümumilikdə indiyədək Azərbaycan millisinin 40 güləşçisi çempionluq sevinci yaşayıb. Komandanın heyətində mütləq rekordçu 10 qələbə ilə Mariya Stadnikdir. Onu 4 titulla Hacı Əliyevlə Xetaq Qaztumov izləyir.
3 qat Avropa çempionları Namiq Abdullayev, Cəbrayıl Həsənov, Rafiq Hüseynov və Həsrət Cəfərov bu sıralamanı davam etdirir.
Daha 8 güləşçi qitənin ən nüfuzlu yarışında "dubl" edib. 25 güləşçimiz isə bir dəfə Avropa çempionluğunun sevincini yaşayıb.
Qeyd edək ki, 2015-ci ildə Bakıda keçirilən ilk Avropa Oyunları həm də Avropa çempionatı statusunu daşıdığı üçün həmin yarışda qazanılan medallar da qitə birinciliyinin hesabına yazılıb.
