Ayxan Abbasov: Qısa müddətdə olan inkişaf məni sevindirir”
“İlk olaraq bizi dəstəkləyən azarkeşlərə təşəkkür edirəm. Bu şəhərdə çıxış etmək çox gözəl idi.
"Mediasport" xəbər verir ki, bu sözləri 21 yaşadək futbolçulardan ibarət Azərbaycan millisinin baş məşqçisi Ayxan Abbasov deyib.
Mütəxəssis Mehdi Hüseynzadə adına Sumqayıt şəhər stadionunda Monteneqro yığması ilə keçirilən yoldaşlıq görüşündən sonra mətbuat konfransında fikirlərini bölüşüb:
"Toplanış çərçivəsində keçirdiyimiz iki oyun qarşıdakı rəsmi matçlara hazırlaşmağa hesablanmışdı. Bu gün futbolçularım öz bacarıqlarını göstərdilər. Onlara təşəkkür edirəm. Məncə, pis nəticə olmadı.
Belarusla səfərdəki görüşdə də məğlub olmaya bilərdik. Heyətimizdə rəqiblə müqayisədə daha aşağı yaş qrupundan olan uşaqlar çoxluq təşkil edirdi. Bu bizi sevindirir, gələcəyə nikbin baxmağa imkan verir.
Hələ işin başlanğıcındayıq. Futbolçuların necə çıxış etmələri klublarında oynamalarından asılı olacaq. Milliyə hazır vəziyyətdə gələndə bizə də asan olur. İstədiyimiz oyun var.
Antalya toplanışı ilə müqayisədə yaxşılığa doğru dəyişiklik hiss olunur. Əsas odur ki, futbolçular meydançada nə etmək lazım olduğunu bilirlər. Qısa müddətdə olan inkişaf məni sevindirir”.
U-21 toplanış çərçivəsində ilk yoxlama görüşünü səfərdə Belarus yığmasına (1:3) qarşı keçirmişdi.
