Azərbaycan növbəti dəfə Avropa çempionatına ev sahibliyi edəcək
Bakıda növbəti dəfə qadın voleybolçular arasında Avropa çempionatı (CEV EuroVolley Women) keçiriləcək.
"Mediasport" xəbər verir ki, ilk dəfə 2017-ci ildə yarışa Gürcüstanla birgə ev sahibliyi edən Azərbaycan doqquz il sonra yenidən bu hüquqa sahib çıxıb.
Ölkəmiz 2026-cı ildə 21 avqust - 6 sentyabr tarixlərində baş tutacaq qitə birinciliyində dörd qrupdan birinə ev sahibliyi edəcək.
Qrup oyunları Bakıda Milli Gimnastika Arenasında təşkil olunacaq.
Avropa Voleybol Konfederasiyasının (CEV) AVRO-2026 üzrə təşkilat komitəsinin nümayəndələri və yayım hüququna malik CEV-in tərəfdaşı olan İnfort şirkətinin əməkdaşları hazırlıq işləri ilə tanış olmaq üçün 24-25 fevral tarixlərində ölkəmizdə səfərdə olublar.
Səfər çərçivəsində qarşılaşmaların keçiriləcəyi Milli Gimnastika Arenasına və voleybolçuların yerləşdiriləcəyi otellərə baxış keçirilib, həmçinin bir sıra digər təşkilati məsələlər müzakirə olunub.
Qeyd edək ki, AVRO-2026-da ümumilikdə Avropanın 24 ən yaxşı komandası dörd qrupda mübarizə aparacaq. Digər qruplara Çexiya, İsveç və Türkiyə ev sahibliyi edəcək.
