"Neftçi"nin rəsmiləri "Mançester Yunayted" əfsanəsi ilə görüşdülər
Türkiyənin İstanbul şəhərində toplanışda olan “Neftçi” Futbol Akademiyasının rəsmiləri “Beşiktaş” klubunun qonağı olublar.
Mediasport.com.az xəbər verir ki, Bakı klubunun nümayəndələri və U-17 komandasının futbolçuları İstanbul nəhənginin “Beşiktaş Nevzat Dəmir” təlim-məşq bazasını ziyarət ediblər.
"Neftçi" rəsmiləri və gənc futbolçular "qara qartallar"ın əsas komandasının məşqini izləyib.
Həmçinin “Neftçi” PFK-nın Futbol komandaları və əməliyyatları üzrə direktoru Zaur Əzizov və “Beşiktaş”ın baş məşqçisi Ole-Qunnar Sulşer bir-birinə hədiyyələr təqdim ediblər və tərəflər xatirə şəkli çəkdiriblər.
Qeyd edək ki, fevralın 9-da “Qalatasaray”, 12-də “Beşiktaş”la qarşılaşan “Neftçi”nin U-17 komandası son yoldaşlıq matçını ayın 14-də “Fənərbağça Dərəağzı” təlim-məşq bazasında “Fənərbağça”ya qarşı keçirəcək.
