SORĞU - Premyer Liqa klubları yay hazırlığını harada keçəcəklər?
Hazırda istirahətdə olan Azərbaycan Premyer Liqası təmsilçilərindən bəzilərinin hazırlıq planları müəyyənləşib.
"Mediasport" xəbər verir ki, bir sıra komandaların təlim-məşq toplanışını ölkə xaricində keçəcəyi artıq dəqiqləşib.
Hazırlıq üçün Azərbaycanı məkan seçənlər də var. Bu barədə “Report”un sorğusuna 12 elita təmsilçisindən cavab verilib.
Anar Hacıyev, “Qarabağ”ın mətbuat katibi: “Toplanış iki mərhələdən ibarət olacaq. İlk mərhələ Bakıda, iyunun 18-dən iyulun 2-dək nəzərdə tutulub. Komandamız iyulun 2-dən 16-dək Avstriyada hazırlıq keçəcək. Hazırlıq çərçivəsində üç oyun günündə ümumilikdə 4 yoxlama görüşü təşkil olunacaq. Rəqiblər barədə daha sonra ictimaiyyətə məlumat veriləcək”.
Asəf Zeynallı, “Neftçi”nin mətbuat katibi: “Hələ tarixlər tam dəqiqləşməyib. Ümumi olaraq deyə bilərəm ki, hazırlıq iki mərhələdən ibarət olacaq. Bu ayın sonunda Bakıda təlim-məşq toplanışına başlayacağıq. Daha sonra komanda ölkə xaricinə yollanacaq. Təbii ki, yoxlama görüşləri də olacaq. Bir neçə gün ərzində hazırlıq planı detallı şəkildə müəyyənləşəcək”.
Elmar Abdullazadə, “Zirə”nin mətbuat katibi: “Hazırlığı Bakıda və Türkiyədə keçirəcəyik. Amma digər detallar hələ tam bəlli deyil. Plan tam müəyyənləşdikdən sonra ictimaiyyətə açıqlama veriləcək”.
Zaur Xudiyev, “Sumqayıt”ın mətbuat katibi: “Təlim-məşq toplanışı ölkə xaricində olacaq, böyük ehtimalla Türkiyədə. Amma tarix və hansı bölgə olacağı hələ ki, bəlli deyil. Bəlli olanda rəsmən açıqlanacaq”.
Süleyman Tağıyev, “Turan Tovuz”un mətbuat katibi: “Hazırda toplanışın planlaşdırılması prosesi gedir. Hazırlığın neçə hissədən ibarət və hansı ölkədə olacağı dəqiq deyil. Yaxın vaxtlarda bununla bağlı klub tərəfindən açıqlama veriləcək”.
Mahal Məmmədov, “Araz-Naxçıvan”ın mətbuat katibi: “İyunun 14-də və 15-də tibbi müayinə olacaq. İyunun 16-dan iyulun 2-dək Bakıda, iyulun 3-dən 17-dək Türkiyənin Ərzurum şəhərində təlim-məşq toplanışı nəzərdə tutulub. Türkiyəyə səfərin tarixində 2-3 gün fərq ola bilər. Türkiyədə 4 yoxlama oyunu nəzərdə tutulub. Rəqiblər və tarixlər barədə əlavə məlumat verəcəyik”.
Yusif Hüseynov, “Şamaxı”nın mətbuat katibi: “Təlim-məşq toplanışı iki mərhələdən ibarət olacaq. İlk mərhələ iyulun 5-də Qəbələdə start götürəcək və iyulun 26-na qədər davam edəcək. İkinci mərhələ isə Şamaxıda avqustun 7-nə qədər davam edəcək. Hazırlıq zamanı 5 yoxlama oyununun keçirilməsi planlaşdırılıb. Rəqiblər hələ bəlli deyil”.
Adil Şükürov, “Kəpəz”in baş məşqçisi: “Tam olaraq heç nə məlum deyil. Heç rəhbərliklə də bu barədə müzakirə aparmamışıq. Qarşıdakı günlərdə bu barədə ətraflı danışacağıq”.
Elnur Həmidov, “Sabah”ın mətbuat katibi: “Yaxın 2-3 gün ərzində bəlli olacaq. Hələ heç nə dəqiq deyil. Hazırlıq planı müəyyənləşdikdən sonra ictimaiyyətə ətraflı məlumat veriləcək”.
Bəhruz Musayev, “Karvan”ın mətbuat katibi: "Yay hazırlıq planı iyunun 20-dən sonra bəlli olacaq. Komanda yay təlim-məşq toplanışını ölkə daxilində keçirəcək. Qəbələ və Quba şəhərlərini nəzərdən keçiririk".
Aqşin Mürsəlov, “İmişli”nin icraçı direktoru: “Qeyd etdiyiniz məsələlərə ən yaxın zamanda aydınlıq gələcək. Klubun idarə heyəti hələ qərar verməyib. Ona görə də bu sualları cavablaya bilməyəcəyəm”.
Səbuhi Səfiyarlı, “Qəbələ”nin idman direktoru: “Hazılıq planı tam müəyyənləşməyib. İyunun 30-dan iyulun 14-nə qədər olacaq ilk mərhələni, çox güman ki, Qəbələdə keçirəcəyik. İyulun 17-si və ya 18-də ikinci mərhələ başlayacaq. Bu mərhələ də böyük ehtimalla Qəbələdə baş tutacaq. Çox az ehtimal da var ki, Tükiyəyə gedək”.
Qeyd edək ki, Azərbaycan Premyer Liqasında 2024/2025 mövsümünün qalibi “Qarabağ” klubu olub. “Zirə” ikinci, “Araz-Naxçıvan” isə üçüncü pilləni tutub. Yeni mövsüm isə avqustun 15-də start götürəcək.
