Apellyasiya Arbitraj Tribunalı Elxan Məmmədovun cəzasını azaltdı
AFFA-nın Apellyasiya Arbitraj Tribunalının növbəti iclası keçirilib.
"Mediasport" xəbər verir ki, iclasda İntizam Komitəsinin çıxardığı qərarlardan verilən iki apellyasiya şikayətinə baxılıb və müvafiq qərarlar qəbul edilib.
I Liqanın III turunun “Karvan-Yevlax”la matçında qırmızı vərəqə alan “Zaqatala”nın futbolçusu Elxan Məmmədov və klubun cərimələnməsi ilə bağlı şikayət qismən təmin olunub.
Qərara əsasən, oyunçunun 6 oyunluq cəzası 4 matça endirilib. Klubun 1000 manat cərimə edilməsi barədə qərar isə qüvvədə saxlanılıb.
U-10 Liqasında keçirilmiş “Karvan-Yevlax” – SUHB oyunu ilə bağlı Səyyar İsmayılovun müraciəti də qismən təmin edilib.
Yevlax təmsilçisinin yarışlardan kənarlaşdırılması və 0:3 hesablı texniki məğlubiyyət verilməsi barədə qərar ləğv olunub.
Yeni qərara əsasən, Kamal İsmayılovun “Karvan-Yevlax” komandasının tərkibində müqaviləsi qeydiyyata alınmadan çıxış etməsinə görə komandaya yalnız həmin matç üzrə texniki məğlubiyyət verilib.
Hər iki şikayət qalan hissədə təmin edilməyib.
