Avropa çempionatında PÜŞK: Millimizin rəqibləri məlum oldu
2026-cı ildə Azərbaycanın da ev sahibliyini edəcəyi qadın voleybolçular arasında Avropa çempionatının püşkü atılıb.
"Mediasport" xəbər verir ki, tədbir İtaliyanın Bari şəhərindəki Norman-Svabian Qalasında təşkil edilib.
Ardıcıl 11-ci dəfə qitə birinciliyinə qatılacaq millimizin rəqibləri Portuqaliya, Niderland, Belçika, Rumıniya və İspaniya yığmaları olacaqlar.
Qrupda 4 yerdən birini tutacaq kollektiv 1/8 finala vəsiqə qazanacaq.
Qeyd edək ki, Avro-2026-nın C qrupunun görüşləri Bakıda keçiriləcək.
Yarışın digər qruplarında matçlar Türkiyə, Çexiya və İsveçdə baş tutacaq.
Turnir avqustun 21-dən sentyabrın 6-dək reallaşacaq.
