"Gənclərimizin xarakter nümayiş etdirmələri məni sevindirdi"
"Təlim-məşq toplanışı çərçivəsində keçirdiyimiz yoxlama görüşlərində məğlub olmamağımız sevindirici haldır. Gənclərimizin həm Moldova, həm də Şimali Makedoniya ilə yoxlama matçlarında xarakter nümayiş etdirmələri məni sevindirdi".
"Mediasport" xəbər verir ki, bunu 21 yaşadək futbolçulardan ibarət Azərbaycan millisinin baş məşqçisi Ayxan Abbasov deyib.
Mütəxəssis yığmamızın Türkiyənin Antalya şəhərində baş tutan təlim-məşq toplanışı haqda danışıb.
O, Şimali Makedoniya yığması ilə qolsuz bərabərliyi şərh edib:
“Qısa müddətdə əksər futbolçulara şans verməyə çalışdıq. Düzdür, bəziləri oynaya bilmədilər. Növbəti toplanışda hamıya bu imkanı vermək istəyirəm.
2006-2007-ci il təvəllüdlü uşaqların U-21-də yer almaları gələcək üçün ümidverici məqamdır. Fikrimcə, hazırlığımız səmərəli keçdi. Futbolçularımızın yaya qədər klublarında mütəmadi oynamaları çox vacibdir. Yay toplanışında daha iki yoxlama matçı keçirməyi nəzərdə tuturuq. Ondan sonra rəsmi qarşılaşmalar barədə düşünəcəyik.
Gənclərimizin həm Moldova, həm də Şimali Makedoniya ilə yoxlama matçlarında xarakter nümayiş etdirmələri məni sevindirdi. Gələcəyə ümidliyik”.
Qeyd edək ki, U-21 toplanış çərçivəsində daha əvvəl Moldova yığmasına qalib gəlib (2:0).
