"Yalan olmasın, rəqib oyunçular bəlkə 20 dəfə yerə yıxıldılar"
"Bu gün istədiklərimizi həyata keçirə bilmədik. Komanda ilk dəqiqələrdən "Turan Tovuz"un təsiri altına düşdü. 2-3 gün ərzində danışdığımız gedişlər meydanda alınmadı".
"Mediasport" xəbər verir ki, bunu "Kəpəz"in baş məşqçisi Azər Bağırov deyib.
Mütəxəssis Azərbaycan Premyer Liqasının 16-cı turunun "Turan Tovuz"la oyunu haqda danışıb, 0:2 hesablı məğlubiyyəti şərh edib:
"Bəzən zəif oyunlar olur. İstəməzdik ki, bu gün olsun. Demək olar ki, heç nə alınmadı. "Turan Tovuz"u təbrik edirəm".
Futbolçular ilin son matçı olduğu üçün istirahətə yollanmağa tələsir?
- Yox. Oyuna yaxşı hazırlaşmışdıq. Futbolçuların motivasiyası da yaxşı idi. Bəlkə də mövsümün yorğunluğundan ola bilər. Çox ağır günlərimiz oldu.
Rəqib oyunçular tez-tez yerə yıxılırdı və hakim də oyunun dayanmasına şərait yaradırdı. Bu, sizin oyununuza mənfi təsir etdi?
- Səbəb tək bu deyil. Rəhim Həsənovla görüşdə bildirdik ki, istəyimiz oyunun tempinin düşməməsi, tez-tez dayanmaların olmamasıdır. Bu gün tək futbolçulara yox, məşqçilər heyətinə psixoloji təsiri oldu. Yalan olmasın, rəqib oyunçular bəlkə 20 dəfə yerə yıxıldılar. Çox vaxt bunda məqsəd vaxt aparmaqdır.
