"Albaniya ilə matçın startında uşaqlarda həyəcan hiss olunurdu"
“Turnirə yaxşı hazırlaşmışdıq. Hər iki rəqib güclü idi. İlk oyunumuz meydan sahibi Albaniya yığmasına qarşı oldu. Standart vəziyyətdən erkən qol buraxdıq".
"Mediasport" xəbər verir ki, bunu Azərbaycanın 17 yaşadək futbolçulardan ibarət milli komandasının baş məşqçisi İlham Yadullayev deyib.
Mütəxəssis Albaniyanın Elbasan şəhərində təşkil olunan Avropa çempionatının II seçmə mərhələsində keçirdikləri oyunları dəyərləndirib.
O, B Liqasında ilk olaraq meydan sahibi Albaniya yığmasına 1:4 hesablı məğlubiyyət haqda danışıb:
"Matçın startında uşaqlarda həyəcan hiss olunurdu. Hissənin sonlarına yaxın oyunu bərabərləşdirdik. İkinci hissəyə ön xətdə pressinqlə başladıq və bunun bəhrəsini gördük. Bərabərlik qolundan sonra irəlidə təzyiqi davam etdirmək istədik.
Ancaq qısa müddətdə qapımızda ikinci qolu buraxdıq. Bundan sonra hücuma atılsaq da, rəqib əks-hücumlarla daha iki dəfə fərqləndi”.
İlham Yadullayev Uels yığması ilə qarşılaşmada (0:0) daha yaxşı oynadıqlarını bildirib:
“Albaniya texniki cəhətdən yaxşı komanda idisə, Uels fiziki və taktiki cəhətdən güclü görünürdü. Bərabər səviyyədə mübarizə getdi.
Birinci hissədə qapımıza təyin edilən penaltini qapıçımız dəf etdi. Bu, futbolçularımızda ruh yüksəkliyi yaratdı. Qol vurmaq üçün imkanlarımız oldu.
Elə mübarizə getdi ki, hər iki komanda qalib gələ bilərdi. Uşaqlarda həyəcan olmadığından bu dəfə daha rahat çıxış etdilər.
İki oyunda 1 xal toplamağımıza görə təəssüflənirəm. Ancaq gələcəkdə daha uğurlu nəticələr qazanmaq üçün əlimizdən gələni edəcəyik”.
