Yeni mövsümün püşkü atıldı - Azərbaycanda yeni liqa yaradıldı

Yeni mövsümün püşkü atıldı - Azərbaycanda yeni liqa yaradıldı

Futzal üzrə 2026/2027-ci illər mövsümünün təqdimat mərasimi keçirilib.

"Mediasport" xəbər verir ki, tədbir çərçivəsində futzalın yeni loqosu təqdim olunub, Yüksək Liqanın və Birinci Liqanın püşkü atılıb.

Yeni mövsümdə Yüksək Liqada 10, Birinci Liqada isə 11 komanda mübarizə aparacaq.

Tədbirdə Azərbaycan Futbol Federasiyaları Assosiasiyasının (AFFA) vitse-prezidenti və İcraiyyə Komitəsinin üzvü Könül Mehdiyeva, AFFA-nın baş katibi Cahangir Fərəcullayev, AFFA rəsmiləri, futzal və futbol ictimaiyyətinin nümayəndələri və media təmsilçiləri iştirak ediblər.

Tədbirin əvvəlində çıxış edən AFFA-nın baş katibi Cahangir Fərəcullayev komandalara yeni mövsümdə uğurlar arzulayıb.

O, AFFA-nın nəzdində Futzal və çimərlik futbolu departamentinin yaradıldığını diqqətə çatdırıb, departamentin kollektivinə fəaliyyətində uğurlar diləyib.

Cahangir Fərəcullayev futzal üzrə Azərbaycan milli komandasının bundan sonra da yalnız yerli oyunçulardan formalaşdırılacağını bildirib.

Tədbir zamanı “Xırdalan 0.0” brendinin futzal üzrə Azərbaycan milli komandasının sponsoru olacağı da açıqlanıb.

Müqavilə AFFA-nın baş katibi Cahangir Fərəcullayev və “Carlsberg Azerbaijan” şirkətinin baş direktoru Krasimir Lazarov tərəfindən təqdim edilib.

Daha sonra Futzal və çimərlik futbolu departamentinin rəhbəri Fərid Babayev Yüksək Liqanın və Birinci Liqanın reqlamentləri barədə məlumat verib.

O, U-19 Futzal Liqasının yaradıldığını və bu yaş kateqoriyasında 6 komandanın iştirakı ilə çempionat keçiriləcəyini qeyd edib.

Reqlamentə əsasən, Yüksək Liqanın birinci mərhələsinin yekununda ilk 6 yeri tutan komandalar Çempionlar qrupunda, 7-10-cu yerləri tutan kollektivlər isə Prestij qrupunda mübarizəni davam etdirəcəklər.

Çempionlar qrupunun qalibi mövsümün çempionu olacaq.

Prestij qrupunu sonuncu pillədə başa vuran komanda Birinci Liqaya düşəcək, 9-cu yeri tutan kollektiv isə Birinci Liqanın ikincisi ilə pley-off qarşılaşmasında üz-üzə gələcək.


Yüksək Liqa. 1-ci tur


Marafon İK – Şuşa MFC

 İmişli – Xankəndi

 Baku Fire – Atidel Ordubad PFK

 Yasamal Bakı – Araz Naxçıvan

 Rəvan FK – Neftçi İK

 
Birinci Liqa. 1-ci tur


Ulduz Bakı – Baku Fire-1

MC Finans – Metropoliten Bakı

Star Kargo – Neftçala PFK

Bakı MFK – İçəri Şəhər Bakı

Xəzər Futzal Klubu – Xan Lənkəran MFK


QEYD: "Timsport" komandası Birinci Liqanın I turunu buraxacaq.